Mkapa: Tuache kutegemea wahisani

Rais Mstaafu wa Awamu ya tatu, Benjamin Mkapa

RAIS Mstaafu wa Awamu ya tatu, Benjamin Mkapa, ameitaka Tanzania kuacha kutegemea misaada mingi kutoka nje ya nchi na badala yake tuwe na nia ya dhati ya kukuza uchumi wetu.

Akizungumza wakati wa ibada ya kuadhimisha miaka 19 ya uinjilishaji wa RedioMaria iliyoambatana na harambee ya kuchangia kituo hicho juzi,  Mkapa alisema imefika wakati Tanzania tusitegemee misaada kutoka mataifa ya ulaya na tujitahidi kujiwezesha yaliyo ndani ya uwezo wetu kwani tukiamua tunaweza kujitegemea.

Mkapa alisema kwa sasa hata misaada ya maendeleo inayotoka mataifa ya ulaya imepungua na ukiwauliza wanasema na wao wana shida kubwa sana kwa kweli tusitegemee misaada kutoka nje.

“Wahisani huko nje wamechoka na naweza kuwathibitishia hilo,  katika safari zangu huko nje za kujaribu kutetea maslahi ya Afrika nakuta kweli wamechoka .

“Ulaya ambayo ilikuja ikatumia rasimali na watu wetu kwa mazingira ya utumwa sasa wangekuwa tayari kuwapokea watu wetu maelfu kwa maelfu huko nyuma walichukua mamilioni lakini tukijituma kwenda kwa maelfu wamechoka hawawezi kutuhudumia,” alisema Mkapa.

Hata hivyo amewataka wanasiasa wanaostaafu kustaafu kwelikweli  na kuacha kuendelea kujiingiza katika siasa ili kuimarisha dhana ya wanasiasa kustaafu hapa nchini.

“Ukistaafu siasa staafu kweli kweli na nilipoambiwa sehemu nyingine niliwaambia mimi ni mstaafu na maana ya kustaafu ni kufunga mdomo,” alisema Mkapa.

Pia amewataka watanzania kuepuka kishawishi cha kujiingiza katika makundi ambayo yanaweza kuiletea nchi athari hasa katika kipindi hiki tunachoelekea katika uchaguzi mkuu.

Awali  akisoma risala kwa mgeni rasmi, Rais wa Redio Maria Tanzania, Julius Humphrey, alisema kwa sasa wameamua kujikwamua na kuacha kuomba misaada maitaifa ya ulaya kama ilivyokuawa awali na kwa miezi sita sasa wamefanikiwa.

“Tangu mwezi Januari mwaka huu tumekua tukijiendesha kwa fedha zetu na kwa michango  ya marafiki wema wa Redio Maria na tumefanikiwa kwa kiasi kikubwa na tunaamini kwa kipindi kilichobaki tutaweza pia,” alisema Humphrey.

Humphrey ametoa wito kwa watanzania na wadau wote wa Redio Mario kusali bila kuchoka ili tuweze kupata viongozi bora mfano wa nabii Musa watakaoweza kutuvusha katika changamoto mbalimbali zinazo ikabili nchi.

Kwa upande wake Askofu Mkuu wa Jimbo Katoliki la Mwanza, Mwashamu Askofu Yuda Rwaichi, amewataka wakristo wote kuendele kuliombea Taifa ili tuendelee kufurahia amani iliopo has katika kipindi hiki tunachoelekea uchaguzi mkuu.

Katika harambee hiyo jumla ya Sh Milioni 48 zilipatikana huku Mkapa na marafiki zake wakichangia jumla ya Sh Milioni 14.